Dening: Muhammad Siswoyo

Cahya nyorot têrang
Hamadhangi pagêlaran
Gangsa, blencong twin wayang
Tansah tinata kanthi rerenggan

Ana wayang bundêr sêr
Raga jiwa katon sêgêr
Netra gêdhe kadya tempeh
Lumrahing ambêg sareh

Bagong ngarannya
Uga sinêbut Mangundiwangsa
Punakawan Jawa Wetan
Tansah guyu lan bêgejekan

Dening R. Raga Budi Panuntun

Iki gêgambaran awur-awuran
Kang ora adoh saka kasunyatan
Sing cilik, pacêklik
Sing gêdhe, nglimpe

Kahanan sangsaya katon kaya paprangan
Pêranging kanêpson mungsuh kawêlasan
Kang padha kuwasa birahi ambungahi
Tumindak cidra tanpa rasa ngrumangsani

Padha rumangsa idune kuwi idu gêni
Tanpa krasa mênawa sih trêsnane wis mati
Padha rumangsa uripe wis kêbak kabungahan
Tanpa krasa rakyate padha kacingkrangan

Kaya ngene iki lêlakoning nêgaraku
Apa kowe tau krungu?
Kudune tau krungu
Amarga nêgaraku, ya nêgaramu

Dening: Nanda Nursa Alya

Nêlangsa kang dak rasa
Angancani wêngi tanpa candra
Dening diyan aning-aning
Bayu sêmbribit anjujug raga
Dandani karsaning ati

Rêrênging banyu tirta
Nandhang rasa kasunyatan
Pamit mungguh ing jaman
Damilih tyasing pakulinan

Aja amung tumêkaning ati
Nalika nandhang trêsna
Krêntêging rasa sih wilasa
Tansah sumandhing jroning pangimpen

Dening: Fazi Arifian Pradana

Apa kaya mangkene kang sinêbut ratu agung
Saisine praja amung kêbak rasa kêduwung
Panguwasa kang ancik-ancik mangewu kunarpa
Dhampar gadhing kang sinungging sarana ludira

Apa kaya mangkene kang sinêbut katrêsnan jati
Pangarêp-arêp mungguh bisa urip mukti dadi siji
Ajur ilang kêsaput lêlakon nggêgirisi ing uni
Kang ora bakal bisa ilang lan ora bisa dilali

Apa kaya mangkene kang sinêbut korbaning panguwasa
Bubat nyêkseni anggone mbabati nyawaning manungsa
Kabeh katut kêna siku dhêndha nadyan kang tanpa dosa
Ilang musna jejering ratu kang kudu duweni rasa pangrasa

Apa kaya mangkene kang sinêbut korbaning katrêsnan
Trêsna suci sêjati kang dudu napsuning panguwasan
Ludirane bangsamu lan uga ludiramu kutah nêlêsi bumi iki
Dadi pêpeling tumrap mapaning kamanungsan rong negari

Apa kaya mangkene lêlakon kang kudu daklakoni
Ingsun ratu nanging jêjibahan ora bisa daktêtêpi
Apa kaya mangkene lêlakonmu dhuh kusumayu
Wangine asmamu pupus mung mêrga deksuraku

Oleh: Ahmad Nur Astha

Tansah katon aneng netra

Eseman lan gemuyu 

Ora bisa dilalekake

Tansah kelingan saben dinane

Wayah dalu durung bisa nendra

Wewayangan mung kumanthil ing sotya

Inten kang dadi pepundhen

Sing tak antu nganti tekan saklawase

Dhuh dyah ayu 

Tulung ngertenana rasaku

Tulus suci mung kanggo sliramu

Tekaning pati tak jaga tresnamu

Dening: Ahmad Nur Astha

Nalika sepisan ketemu karo sliramu

Tak sawang esem lan gemuyumu

Sing nambahi kangen sedina ora ketemu

Datan sakedhep yen nyawang netramu

            Tak gandheng tanganmu

            Nyawang ilining banyu

            Tak ungkapake rasaku

            Rasa tresna marang sliramu

Sineksen endahe lampu tengah kutha

Sliramu kandha yen bakal tresna

Nalika wayah wengi sing ngancani ngucap janji

Mendhung ing mega uga melu hanyekseni

            Duh pepujaning ati

            Amung sliramu sing tansah tak anti

            Rina lan wengi

            Tan bisa merem senadyan wus nyandhak madya ratri