Lelananging Jagad Anyiptaning
dening Gibran Nicholau
Apeparab Lananging Jagad
Kinaya-aya panonton kang winangenan kelir
Kusumeng lisan para priya melik dhateng kasektenira
Sekar lathining reraosan para putri
Ananging, “Cedhis Arjuna!” ujarira pra feminis
Pangejawantah patriarki kang amarwasani
Bathuk klimis pinaringan begja dening rupa
Wanita kadadekna koleksi ngarat-arat dening Sang Parta
Mangkana panemunira.
Ananging, “Bangsat Janaka!” sumbarira para jejaka idhealis
Pawitan kincanging alis
Anelasak sumpenaning wanodya
Angsal kardi nelukake atining pra kenya trusing widadari
Mangkana sambatira.
“He, marenana nggonmu ngalamun!” suraking swara tanpa rupa,
“Ragamu tumandang pacakara mungsuh angger Sitija, ning pikiranmu nyrambah ra karuwan?!”
Pating calengkring swaranira angadu cucuking braja
Pating pletik wilah pedhang katarung candrasa
Ing wusana Janaka kontal
Sinjangnya bedhah
Mlumpruk ingkang ambek sudira pindha pranatacara kalipyan dandananira
Kadiparan mbesuk ing Baratayuda Jayabinangun
Lamun ing perang Gojalisuta suda kaprayitnanira?
Janaka nunten nimbali Ki Lurah Kanthongbolong,
“Biwarakna duta penglawung
Lamun bendaramu wus sirna ing rananggana
Mbesuk aku bakal mulih
Saka ing Indrakilardi
Ambedhah pepetenging pikir kang nyuremi atiku
Sarta wisikan panggirigodha
Ora mung saka samadi
Nadyan panantanging dewa marang nepsu sedya ndak ungkuli
Lamun Lananging Jagad
Dudu bajingan thukmis ingancam sipilis
Nanging manungsa sakwutuhing janma.”
Bantul, 2 Pasa Jimakir 1954
