Dening : Affan Akbar, Sastra Jawa 2020
Jagat gonjing, Bawana geger
Geger dening ruhara
Ndonya wus kebegan kamurkan
Muka yaksa, bleger buta, ambeg watak raseksa
Ubenging bumi kaya hanyekseni tumangkaring watak candhala, budi nistha
Ingkang nekem jagat
Panguwasa dadi garan numpuk bandha
Golek urup kanthi cara korup
Ngupaya bathi kanthi kolusi
Tandha tangan kanggo sarana golek pangan
Gesang tan manggih tentrem
Tebih marang meneping rasa
Anane mung kumrangsang golek menang
Kridha ngupaya kuwasa
Umreg ngupadi wareg
Piwulange pastur padha disingkur
Para kyai padha disingkiri
Nanging malah padha njiat anggone tumindak maksiat
Adigang adigung adiguna ing sadhengah papan
Yekti dadi mungsuhe kautaman
